حماتى كل ماتاكل حكايات زهره الربيع 1

العيون كلها اتجهت ببطء ونظرات ذهول ناحية أميرة، اللي كانت واقفة في أخر الصالة، وشها بقى متغرق عرق، وركبتها بتخبط في بعضها من الرعب. أميرة اللي كانت دايماً بتظهرلي الوش الحنون، بتضحك في وشي وتجيبلي العصير وأنا بشتغل في المطبخ، وبتقولي «تسلم إيدك يا هالة أنتِ نورتي البيت».
خالد قام من مكانه زي المجنون، وقرب منها وهو بيترعش من الغضب:
— «أنتِ؟! أنتِ يا أميرة اللي بتعملي في أمي كده؟! أنتِ اللي بتحطي التسمم والأقراص في الأكل عشان تلبسيها لـ هالة؟! ليه؟! أمي عملتلك إيه؟! وهالة عملتلك إيه؟!»
أميرة رجعت لورا وهي بتصرخ وتعيط هستيري:

— «لا والله العظيم! أنا مش قصدي أسم عميمة! والله ما قصدي أذيها هي!»
جوزها “محمود” قرب منها ومسكها من دراعها بقوة وهو مش مصدق:
— «يعني إيه مش قصدك تأذي أمي؟! أنتِ بتعترفي يا أميرة؟! أنتِ بتحطي إيه في الأكل؟! نطقي بدل ما أقتلك في إيدك دي!»
أميرة وقعت على الأرض وانهارت في العياط، وبدأت تعترف بلسانها، والاعتراف كان أبشع وأمر من كل اللي اتخيلناه.
قالت وهي بتبصلي بنظرات كلها غل وحقد:
— «أنا كنت بحط مسهل قوي.. مسهل طبيد وبودرة بتعمل تقلصات وترجيع في المعدة! بس والله العظيم ما كنت بحطه لأمك يا محمود..

أنا كنت بحطه في الطبق اللي هالة هتاكل منه!»
الكلمة نزل علينا كلنا زي الصاعقة.
سمر سلفتي اتكلمت بذهول:
— «تحطيه لـ هالة؟! وليه أمي هي اللي كانت بتتعب كل مرة بدالها؟!»
أميرة وهي بتشهق من العياط كملت:
— «لأن هالة.. هالة من يوم ما دخلت البيت ده، وحماتي طايرة بيها! كل ما هالة تعمل حاجة تقول “شوفوا هالة العاقلة”، “شوفوا هالة الشاطرة”، “شوفوا الأكل اللي من إيد هالة”! أنا بقالي ثلاث سنين في البيت ده، باكل التراب عشان أثبت إني كويسة، ومفيش كلمة حلوة طلعتلي!

فلما هي جت وأخدت السجادة من تحت رجلي، قلت أكسر عينها.. قلت أخليها تاكل الأكل من هنا، ويجيلها إسهال وترجيع قدامكم كلكم، وتبان إنها قرفانة ومقرفة وما بتستحملش، أو تظهر إنها بتتظاهر بالتعب عشان ما تطبخ تاني!»
عايدة اخت خالد صرخت فيها:
— «طب وطالما أنتِ عايزة تأذي هالة.. أمي مالها؟! أمي كانت بتموت طول الليل بقالها شهرين!»
أميرة غمضت عينها وبدأت تبكي بدموع ندم وحسرة وقالت:
— «ما كنتش اعرف.. ما كنتش اعرف إن عميمة حنينة أوي كده!