اخويا سرقني 1حكايات صافي هاني
فريدة لفت لكريم بعصبية وعينيها بتطلع شرار، وصوتها طلع حاد ومرعوب: “كريم! إيه العك ده؟ إنت مش قولتلي إن العزبة دي ورث ومكتوبة باسمك وباسم أخوك بالتساوي وإنه عامل حصر إرث وتنازل؟ الفلوس فين يا كريم؟”
هنا الراجل اللي لابس بدلة كحلي رخيصة أتدخل بصوت مرتعش والفايل اللي في إيده بيتهز: “يا فندم.. يا فندم أنا ماليش دعوة، أنا وسيط ومحامي تبع مكتب العقارات اللي الأستاذ كريم اتعامل معاه، والـ 150 مليون جنيه أتحولوا كاملين من حساب المستثمر لحساب الأستاذ كريم من تلات أيام بناءً على صورة التوكيل اللي قدمها، والعقد الابتدائي اتوقع!”
ضحكت تاني، بس المرة دي كانت ضحكة باردة، تخلع القلب. بصيت للمحامي وقلتله: “والله يا متر إنت والمكتب بتاعك هتروحوا في داهية بتهمة التزوير وعدم التحقق من صحة المستندات الرسمية، مفيش حاجة اسمها عقد ابتدائي على أرض مش ملك البايع، والأستاذ كريم قبض فلوس مش من حقه بناءً على ورق لاغي، يعني ببساطة.. دي جناية نصب واحتيال مكتملة الأركان.”
كريم وشه جاب ألوان، ورمى نفسه على عربيتي ويمسك في كم قميصي وهو بيعيط وبيتوسل: “تامر.. تامر عشان خاطر أمنا الله يرحمها.. أنا اتدبست، فريدة قالتلي إن مشروع القرية السياحية بتاعها هيفلس وهيتحبسوا، وأنا قولت العزبة دي بعيدة ومحدش حاسس بيها، قولت هبيعها وأشغل الفلوس معاها ولما نكسب هردلك فلوسك وزيادة، متخربش بيتي يا تامر، المستثمر لو عرف هيبهدلني!”
زقيت إيده عني بمنتهى القسوة والبرود، وبصيت وراهم، لمحت غبار كثيف طالع من أول المدخل، وصوت عربيات كتيرة بتقرب من البوابة بسرعة جنونية.
فريدة بدأت تصرخ في كريم: “مشروع إيه اللي يفلس؟ إنت ضيعتني وضيعت نفسك! أنا ماليش دعوة بيك، الفلوس في حسابك إنت اللي حولتلي منها جزء!”
العربيات وصلت وفرملت فجأة وعملت صوت صريخ فظيع، ونزل منها تمن رجالة بحجم الحيطة، سيكيوريتي وحراسة خاصة، ووراهم نزلت عربية مرسيدس سودا مصفحة، فتح بابها راجل عجوز وقور جداً، باين عليه الهيبة والثراء الفاحش، ملامحه كانت صارمة وعينيه زي الصقر، وأول ما نزل المحامي اللي بالبدلة الكحلي جري عليه وهو بيترعش ويقول: “يا باشا.. يا شاهين بيه.. الحقنا، في مصيبة!”
شاهين بيه مشي ببطء، وبص لكريم اللي كان واقع على الأرض من الرعب، وبعدين بصلي أنا. الغريب إني مكنتش متفاجئ، كنت باصص لكل المسرحية دي وأنا حاطط إيدي في جيبي ومستني اللحظة دي بالذات.
