اخويا سرقني 1حكايات صافي هاني
شاهين بيه قرب مني، ومد إيده يسلم عليا وقال بنبرة هادية بس ترعب: “أهلاً يا بشمهندس تامر.. أنا شاهين الألفي، المشتري اللي أخوك الكريم قبض منه الـ 150 مليون جنيه كاش وتحويلات عشان يبيعلي جنة الأرض دي.. بس واضح كده من لغة الحوار اللي سمعتها وأنا جوة العربية، إن أخوك لعب بينا إحنا الاتنين.”
بصيت لشاهين بيه وقلتله بثبات: “أهلاً بيك يا شاهين بيه، اسمك غني عن التعريف، بس للأسف أخويا بايعلك الهوا، الأرض دي ملكي لوحدي، والتوكيل اللي معاه لاغي من ست شهور.”
شاهين بيه سكت لحظة، وبص لكريم اللي كان بيموت من الرعب، وفريدة اللي كانت بتحاول تستخبى ورا المحامي. شاهين بيه ابتسم ابتسامة ترعب، وشاور لرجالته وقال بصوت جهوري هز المكان كله: “بقالي أربعين سنة في السوق، محدش استجرأ يغفلني أو ينصب عليا في مليم.. بقى حتة عيل ميسواش بصلة ياخد فلوسي ويديها لخطيبته عشان يداروا على غسيل أموال وإفلاس؟”
كريم صرخ: “والله العظيم ما كنت أعرف إن التوكيل ملغي! أنا كنت فاكره شغال!”
شاهين بيه مالتفتش ليه أصلاً، وبصلي وقالي: “يا بشمهندس تامر، أنا راجل بحب الأصول، وإنت مالكش ذنب، العزبة دي أنا دافع فيها نص ثمنها وعايزها، وإنت ليك عندي الـ 150 مليون التانيين كاش دلوقتي، وتمضيلي على عقد البيع الصحيح ونقفل الصفحة دي.. وأخوك ده، رجالي هيعرفوا يتصرفوا معاه ومع خطيبته عشان يرجعوا الـ 150 مليون اللي خدوهم، بطريقتنا الخاصة.. إيه رأيك؟ تبيع وتاخد حقك كامل وتخلص من وجع الدماغ، وتنسى إن ليك أخ أصلاً؟”
في اللحظة دي، الدنيا اسودت في عين كريم، وبصلي بنظرة رجاء أخيرة، وهو عارف إن كلمة واحدة مني ممكن تنهي حياته أو ترميه ورا الشمس في مخازن شاهين الألفي اللي ميرحموش. فريدة وقعت في الأرض من الخوف، والمحامي استخبى ورا العربية.
كلهم كانوا باصين ليا.. مستنيين قراري اللي هيحدد مصير الـ 300 مليون جنيه.. ومصير رقبة كريم.
#حكايات_صافي_هاني
