قضية نسب 1حكايات صافي هاني
أنا مشيت مرفوعة الراس، والكل باصص في الأرض من الخزي والعار. أول ما نزلت وركبت العربية، سمعت صوت سرينة عربية الشرطة العسكرية وهي داخلة الشارع عشان تجيب طارق وتجيب صاحب المعمل المضروب.
بعد أسبوعين بالتمام والكمال..
كنت واقفة في مكتب النيابة العسكرية، بكامل هيبتي وبدلتي الميري. طارق كان واقف قدام وكيل النيابة، وشه ضاهر عليه الذل، وعينيه منفوخة من قلة النوم والخوف، وجنبه أمه الحاجة صفاء اللي كانت بتعيط وتدعي وتقول: “يا رب استرنا.. يا رب ارفع غضبك عننا.”
وكيل النيابة مسك التقرير الرسمي اللي واصل حالاً من المعامل المركزية للقوات المسلحة، وبص لطارق وقال بصوت جهوري: “التقرير الرسمي والنهائي لإثبات النسب، المعتمد من وزارة الدفاع والجهات القضائية، أثبتت فيه البصمة الوراثية تطابقاً بنسبة 99.9%.. الطفلة مريم هي ابنتك الشرعية من صلبك.”
طارق أول ما سمع الجملة دي، وقع على ركبه في الأرض وبدأ يعيط بهستيرية وزحف لحد عندي وهو بيحاول يمسك في رجلي ويقول: “سامحيني يا منى! أنا اضحك عليا.. الشيطان شاطر وأمي هي اللي فضلت تزن في ودني وتقولي البنت مش شبهك ومسافرة في الجيش وبتغيب عن البيت! أنا غبي.. أبوس إيدك سامحيني وماتخربيش البيت!”
حماتي قربت مني وهي بتبكي وتتمسح فيا: “يا بنتي حقك عليا، أنا اللي عجزت وخرفت وشككت فيكي.. الله يخليكي اتنزلي عن القضية، طارق مستقبله هيضيع وهيتحبس، والناس هتاكل وشنا في المنطقة!”
أنا رجعت خطوة لورا بكل برود، وبصيت لهم بنظرة احتقار، وقبل ما أنطق، وكيل النيابة خبط على المكتب وقال: “اسكت أنت وهي! القضية دي مفيهاش تنازل.. دي جناية تزوير في أوراق رسمية، وبلاغ كاذب، وتشهير بظابط قوات مسلحة أثناء تأدية وظيفتها.”
التفت وكيل النيابة ليا وقال: “سيادة النقيب منى، هل عندك أي أقوال إضافية؟”
بصيت لطارق وأمه بكل ثقة وفخر وقلت: “أنا ماليش أقوال يا فندم.. أنا بس بشكر ربنا اللي نصرني ونصر بنتي، وبشكر قضاء مصر العادل وجيشنا العظيم اللي بيحمي شرف ولاده. أما بالنسبة لـ طارق، فأنا رفعت قضية خلع ونفقة، ومش عايزة أشوف وشه تاني.. هو وأمه سقطوا من نظري ومن حياتي للأبد.”
خرجت من مكتب النيابة وأنا حاسة إن الهوا نقي، وبصيت للسما وقلت: “الحمد لله رب العالمين.. ويمكرون ويمكر الله والله خير الماكرين.” ونظرت لمريم اللي في حضني وابتسمت، لأننا من النهاردة هنبدأ حياة جديدة، نظيفة، ومرفوعين الراس.
