اوضة النوم حكايات روماني مكرم
الكاتب_رومانى_مكرم
الكلمة نزلت على أمي زي الصاعقة، وتامر وشه جاب ألوان، وأنا وقفت في النص مش عارف أحوش مين ولا مين، والشرارة الأولى قادت، واللي جاي مش هيعدي على خير…
**الجزء الثاني:**
وقفت في النص بين أمي وهدى، والدنيا بتلف بيا. كلمة هدى “راجل غريب” نزلت على أمي وتامر زي السكين الحامي. تامر وشه جاب ألوان، وعروق رقبة أمي برزت واتنفضت من العصبية، وصوتها طلع زى الزلزال وهي بتشاور بصابعها في وش هدى: “راجل غريب؟! تامر أخو جوزك بقى راجل غريب يا ست هدى؟ ده اللي متربي معايا في الشقة اللي تحتك! ده اللي أمه طفحت الدم عشان تجيب الشقة دي وتفرشها! إنتي جاية تقوليلي غريب في ملك ابننا؟”
هدى متهزتش، فضلت واقفة مكانها، ملامحها ثابتة بس عيونها كانت مليانة عتاب وغضب مكتوم، بصت لأمي وقالت بصوت واطي بس حاد: “يا ماما، الدين والشرع هما اللي بيقولوا كده مش أنا. تامر أخو جوزي على عيني ورأسي، بس مينفعش يدخل أوضة نومي وأنا مش موجودة، وفي غيابي. الأوضة دي فيها لبسي الخاص، وفيها أسراري أنا وكريم. أنا مقفلتش الشقة كلها، أنا قفلت خط أحمر ميرضيش ربنا إن حد يعديه.”
“بلا شرع بلا دين! إنتي بتعلمينا الأدب يا بنت الأكابر؟” أمي صرخت وهي بتلتفت ليا، وعينها مليانة دموع من القهر والغضب: “شايف يا كريم؟ شايف المتربية العاقلة اللي اخترتها؟ بتطردنا من الشقة عيني عينك وبتعمل لابني هيبة غريب في بيت أخوه! لو المرة دي عدت والباب ده متفتحش وطأطأت راسها واعتذرت، لا إنتي ابني ولا أعرفك، والبيت ده ميبقاش ليكي قعاد فيه!”
تامر حاول يتدخل، مسك دراع أمي وهو بيشدها لبرة: “خلاص يا أمي، يلا ننزل، أنا مش عاوز أنام في زفت، الشغلة مش حرزانة كل ده، يلا بينا.” بس أمي زقته جامد وقالتله: “سيبني يا تامر! دي مبقتش قصة نومة وتكييف، دي قصة كرامة! دي جاية تلويلنا دراعنا في بيتنا!”
كل ده وأنا واقف زي الصنم، باصص لأمي وباصص لهدى. الشغل وطحن اليوم والخرسانة في كوم، والولعة اللي قادت في بيتي دي في كوم تاني. زعقت فجأة بصوت هز الصالة كلها: “بس بقى! خلاص! كله يسكت!”
الكل سكت وبصوا لي. بصيت لهدى وقولتيلها بنبرة لوم: “مكثتيش الكلمة ليه يا هدى من الأول؟ أخويا تعبان والنور قاطع، كان فيها إيه لو عديتيها؟”
هدى بصتلي بصدمة، كأنها متوقعتش إني آجي عليها، وقالت ونبرة صوتها اتهزت لأول مرة: “أعديها؟ يعني إنت راضي إن أخوك يدخل ينام على سريرنا ووسط حاجتي الخصوصية يا كريم؟ دي أصولك اللي اتربيت عليها؟”
