أمي طلبت كليتي وأنا لسه عايشة ج3 حكايات شروق خالد

الحارة كلها اتجمدت. ولا حد نطق. حتى أم سعيد اللي كانت طول عمرها صوتها عالي، حطت إيديها على بقها من الصدمة. بصيت لسعيد وأنا حاسة إن الأرض بتميد بيا. قلتله وأنا بزق الكرسي المتحرك لقدامه: "انطق... مين اللي مات؟" سعيد قعد على الأرض، وفضل يبص حواليه بخوف. "لو اتكلمت... هيقتلوني." المعلم رزق زعق فيه: "هيقتلوك إزاي وهما في الحبس يا جدع؟ قول اللي عندك." سعيد بلع ريقه وقال: "مش كل اللي معاهم كان اتحبس." قلبي دق جامد. "يعني إيه؟" سعيد خد نفس طويل وقال: "من سبع سنين... كان فيه واحد اسمه عم حسين." أول ما سمعت الاسم، افتكرته. عم حسين الميكانيكي... الراجل الطيب اللي كان عنده ورشة في أول الحارة. هو اللي علمني أسوق وأنا عندي سبعتاشر سنة. وهو نفسه اللي كان بيقول دايمًا: "فرامل العربية دي متلعبوش بيها يا بنتي... دي فيها روح بني آدم." سعيد كمل وهو بيعيط: "عم حسين شاف أبوكي وأحمد وهما بيفكوا فرامل عربية واحد بالليل." شهقت. "إيه؟" "راح يهددهم إنه هيبلغ الشرطة." "وبعدين؟" سعيد غمض عينه وقال: "تاني يوم لقوه ميت في الترعة... وكل الناس قالت رجله زلت." أم سيد صرخت: "يا ساتر يا رب!" أنا جسمي كله ساقع. "يعني... قتلوه؟" سعيد هز راسه. "أنا كنت السواق... وأنا اللي وصلتهم المكان." دموعي نزلت. افتكرت جنازة عم حسين. افتكرت مراته وهي بتصرخ: "حسبي الله ونعم الوكيل." افتكرت إننا كلنا صدقنا إنها حادثة. لكن الحقيقة... كانت جري..مة. في اللحظة دي... دولت المحامية قالت بحزم: "كفاية كلام في الشارع... كل ده لازم يتقال قدام النيابة." وفعلًا... بعد ساعتين كنا قاعدين قدام وكيل النيابة. سعيد حكى كل حاجة. حكى عن الرشاوي. وعن التزوير. وعن الحادثة اللي عملوهالي. وعن عم حسين. ولما خلص... وكيل النيابة قفل الملف، وبص لدولت وقال: "اطلبوا إذن فوري بتفتيش بيت عبدالعزيز." تاني يوم الصبح... الشرطة دخلت البيت. البيت اللي أمي كانت دايمًا تقول إنه "قصر العيلة." فضلوا يفتشوا أكتر من ثلاث ساعات. وفجأة... واحد من الظباط نادى بصوت عالي. "يا فندم... تعالى شوف." كلهم جريوا. كان فيه حائط في أوضة النوم بيتحرك. ورا الدولاب الكبير. أزالوا الدولاب... ولقوا باب حديد مستخبي. ولما فتحوه... نزلوا سلم ضيق لتحت. أوضة سرية. جواها خزنة كبيرة. وأكياس فلوس. ودهب. وأوراق ملكيات. لكن اللي خلى الظابط يقف مصدوم... ألبوم صور قديم. فتح أول صورة... فشهق. لأن الصورة كانت لأبويا... واقف بيضحك... وجنبه أحمد... وأمامهم عم حسين. والتاريخ المكتوب على الصورة... كان قبل موته بساعات. ساعتها الظابط قال جملة واحدة: "القض..ية دي أكبر بكتير مما كنا متخيلين." أما أنا... فكنت حاسة إن الحقيقة لسه بتكشف وشها. وإن كل باب بيتفتح... ورا منه مصيبة أكبر من اللي قبلها. حكايات شروق خالد بعد ما الصورة اتعرضت قدام الكل، النيابة أمرت تتحفظ على كل اللي في الأوضة السرية. الدهب... الفلوس... العقود... وحتى الألبوم. وأنا قاعدة ببص، حسيت إن في حاجة مش مظبوطة. الصورة كان فيها أبويا... وأحمد... وعم حسين. بس كان فيه واحد رابع. وشه متشخبط عليه بقلم أسود. بصيت للظابط وقلت: "مين ده؟" هز كتفه. "واضح إن حد حاول يخفي هويته." لكن سعيد أول ما لمح الصورة، وشه قلب أبيض. بدأ يرجع لورا وهو بيرتعش. "لا... لا... الصورة دي مينفعش حد يشوفها." الظابط مسكه من دراعه. "إنت عارف مين ده؟" سعيد نزل راسه. وسكت. الظابط زعق: "اتكلم." قال بصوت متقطع: "ده... ده المعلم شوقي." الاسم نزل علينا زي الصاعقة. المعلم شوقي... كبير المنطقة. الراجل اللي الناس كلها كانت بتعمله ألف حساب. صاحب مخازن الحديد، وصاحب النفوذ، واللي محدش كان يقدر يقف قصاده. عم سيد البواب شهق. "يبقى كل السنين دي... كان شريكهم؟" سعيد هز راسه. "هو اللي كان بيخلص لهم أي مصيبة... ولو حد اتكلم... كان بيسكته." دولت المحامية بصت للظابط وقالت: "لازم يتقبض عليه فورًا." لكن قبل ما الظابط يرد... تليفونه رن. رد بسرعة. وفجأة ملامحه اتغيرت. "إيه؟!... إمتى؟" قفل السكة وبص لنا. "المعلم شوقي هرب." قلبي وقع. "هرب؟!" "قبل ما نوصل بيته بعشر دقايق... ساب كل حاجة واختفى." في نفس الليلة... رجعت بيت جدي. كنت مرهقة ومش قادرة أنام. كل ما أغمض عيني أشوف وش أمي... وأبويا... والحادثة. قمت أشرب كوباية مية. ولما عديت جنب أوضة جدي... سمعت صوت خفيف. زي صوت درج بيتقفل. وقفت مكاني. البيت كله كان فاضي. يبقى مين؟ مسكت عصاية جدي الخشب، ومشيت على أطراف صوابعي. فتحت باب الأوضة بسرعة. مفيش حد. لكن الشباك كان مفتوح. ولقيت على الأرض ظرف أبيض. التقطته. كان مكتوب عليه بخط كبير: "لو عايزة تعرفي مين قتل عم حسين بجد... تعالي لوحدك، بعد بكرة، الساعة عشرة بالليل، عند المخزن القديم اللي ورا محطة القطر." ماكانش فيه اسم. ولا أي توقيع. دولت أول ما شافت الجواب قالت: "ده فخ... مستحيل تروحي." بصيت للورقة مرة تانية. وفي آخرها كان فيه سطر صغير خلّى الدم يتجمد في عروقي: "وبالمناسبة... مش كل أفراد عيلتك دخلوا السجن." رفعت عيني لدولت. وقلت بهدوء: "يبقى فعلًا... الحرب لسه ما بدأتش." حكايات شروق خالد دولت رمت الجواب على الترابيزة وهي متعصبة. "إنتِ لو فكرتي تروحي، يبقى بتروحي برجلك للموت." بصيتلها وأنا بهدي نفسي. "ولو ماروحتش... عمري ما هعرف الحقيقة." سكتت شوية، وبعدين طلعت تليفوني. فتحت الرسائل. كتبت رسالة للظابط المسؤول عن القض..ية، وحددت فيها المكان والميعاد، وبعتها من غير ما أقول لدولت. أنا كنت عارفة إن اللي باعت الجواب عايزني أروح لوحدي... لكن أنا كان عندي خطة تانية. لما الساعة قربت عشرة بالليل، لبست إسدال أسود واسع، وغطيت وشي بطرحة، وركبت تاكسي لحد آخر الشارع. المخزن القديم كان مهجور. حواليه عربيات مكسرة، وكلاب ضالة بتلف في المكان. الهوا كان ساكت بشكل يخوف. دخلت وأنا قلبي بيدق. وفجأة... سمعت صوت جاي من الضلمة. "كنت متأكد إنك هتيجي." لفيت بسرعة. راجل كبير في السن خرج من بين الصناديق. دقنه بيضا، ولابس جلابية رمادي. أول ما شوفته حسيت إني شوفته قبل كده. قال: "ما تخافيش... أنا مش جايلك أضرك." قلت بحذر: "إنت مين؟" رد: "أنا رجب... شريك عم حسين في الورشة." افتكرته. كان اختفى بعد موت عم حسين، وكل الناس قالت إنه سافر الخليج. قلتله: "إنت كنت فين السنين دي؟" تنهد وقال: "مستخبي... لأن اللي قتل عم حسين حاول يقتلني أنا كمان." قبل ما أسأله أي حاجة... طلع من جيبه كيس بلاستيك قديم. اداهولي. "ده كان أمانة عندي." فتحته بسرعة. كان جواه ساعة يد مكسورة... وسلسلة فضة... وكاسيت تسجيل قديم. استغربت. "إيه ده؟" رجب قال: "الساعة دي كانت بتاعة عم حسين... وقفت لحظة ما اتقتل." وأشار على الكاسيت. "أما ده... ففيه صوت القاتل." اتجمدت. "صوت القاتل؟" هز راسه. "عم حسين كان ركب جهاز تسجيل صغير في الورشة بعد ما شك فيهم." في اللحظة دي... نور عربيات قوي ضرب وشنا. وراءه صوت فرامل حاد. رجب اتخض. "اهربي!" قبل ما أفهم... نزل تلات رجالة ملثمين من عربية نص نقل. واحد منهم طلع فرد خرطوش. وزعق: "هاتوا الكاسيت... والبنت متطلعش من هنا عايشة." لكن اللي الرجالة ماكانوش يعرفوه... إن قوة من الشرطة كانت مستخبية على بعد أمتار، مستنية الإشارة بعد الرسالة اللي بعتها. وفجأة... اتملّى المكان بصوت الظباط: "شرطة! ارموا السلا..ح!" وفي ثانية واحدة... اتحول المخزن لساحة مطاردة، والرصاص صوتُه دوّى في المكان، وأنا حضنت الكاسيت بكل قوتي، لأن إحساسي كان بيقولي... إن الشريط الصغير ده... هو اللي هيكشف الاسم الحقيقي للشخص اللي بدأ كل الكوابيس دي من سنين. حكايات شروق خالد