اخويا عزم خطيبته 2
نور بصلتي بذهول، وأنا هزيت لها رأسي بالوافقة. البنت قربت إيدها الصغيرة وحطتها في إيد أبوها. عصام مسك إيدها بضعف شديد، ودمعة سخنة نزلت من عينه على خده.
قال بصوت مكسور يقطع القلب: “سامحيني يا نور.. سامحيني يا بنتي.. الشيطان كان عامي قلبي.. كنت بشوف يوسف فيكي ونسيت إنك حتة مني.. سامحيني يا نور قبل ما أقابل ربنا..”.
نور انفجرت في البكاء وأترمت على صدره، وحطت رأسها على كتفه وهي بتصرخ: “مسامحاك يا بابا! والله مسامحاك! بس متسبنيش وتمشي.. أنامش زعلانة منك والله بس ارجع معانا البيت!”.
عصام ضمها بإيده التانية بكل القوة اللي فاضلة فيه، وبصلي بدموع وندم وقال: “سامحيني يا فضل.. أنا ظلمتكم وهدمت بيتي بإيديا.. احمي نور يا فضل.. أمانة في رقبتك..”.
وفجأة.. صوت الأجهزة زاد بسرعة وشدة، والشاشة بدأت تطلع صفارة طويلة ! جسم عصام اترعش ونظرته اتجمدت في السقف، وإيده سابت إيد نور ووقعت على السرير!
الدكاترة والممرضين دخلوا يجروا على الأوضة، وزقونا بره العناية وسط صراخي وصراخ نور وهي بتنادي: “باباااا! بابا رد عليّ يا بابا!”.
خرجنا الصالة وورايا الأبواب اتقفلت، ونور أغمى عليها في حضني من كتر الصدمة . الصدمات كانت ورا بعضها، وأنا واقفة في وسط المستشفى مش عارفة عصام عايش ولا ، وبنتي بين إيديا فاقدة الوعي، والحياة بتظلم في وشي من تاني!
صرخت بأعلى صوتي وأنا شايلا نور بين إيديا ومظلمة الدنيا في وشي، الممرضين أخدوا البنت مني بسرعة ودخلوها أوضة الملاحظة اللي جنب العناية، وأنا بقيت واقفة في الممر مش عارفة أروح فين ولا أطمن على مين.. أطمن على جوزي اللي قلبه وقف جوه والعناية اتقلبت مناحة، ولا أطمن على بنتي الطفلة اللي جدران المستشفى شربت دموعها وانهارت بين إيديا؟
فضلت أتحرك في الممر زي المجنونة، وفاء أخت عصام كانت بتلطم على خدودها وجوزها بيحاول يديها مية، والممرضين طالعين داخلين يجروا بالصدمات الكهربائية لأوضة عصام. كل ضربة جهاز كنت بحسها في قلبي أنا، صوت الصفارة المنتظمة اللي بتعلن توقف القلب كان بيرن في ودني زي أذان .
بعد أطول ربع ساعة مرت عليا في حياتي، خرج الدكتور وهو بيمسح العرق من على جبهته، وش أصفر وملامحه مرهقة أقصى درجة. جريت عليه وأنا بمسك في بالتو بدموع تحرق: “دكتور! أرجوك قول الحقيقة.. عصام جراله إيه؟ عاش ولا سابنا؟”.
