اهلي كسرو بخاطر ابني حكايات صافي هاني
نزلت لمستوى مروان، مسكت إيده الصغيرة اللي كانت بتترعش، وأخدت الكارت الملون اللي هو عامله لجده من على الطاولة وحطيته في شنطتي. مروان بصلي وعيونه مليانة دموع بس حست بجواها بنبرة فخر.. حس إن أمه جابت له حقه وحمته وسط الذئاب دي.
شنطتي بقت على كتفي، وإيد ابني في إيدي، والويتر أخد الفيزا بتاعتي ودخل جوة عشان ينفذ الأمر..
وقبل ما أتحرك خطوة واحدة ناحية الباب، لفيت لإيهاب ولأمي وللكل، وقلت بابتسامة تخر الشغل:
”العزومة دي على شرف أبويا.. وأنا بألف هنا وشفا على قلوبكم الأكل اللي كلتوه.. بس افتكروا كويس، الأكل ده مرادي، وكل لقمة هتبلعوها الليلة دي، هتدفعوا تمنها من دم قلبكم كاش.. عشان تعرفوا بعد كده تفرقوا بين مناب ولادكم، ومناب ابني.”
إيهاب وقف مكانه زي المشلول، مراته بدأت تفتح شنطتها وتفرك في إيدها بقلة حيلة، والوجوم حل على الـ 22 فرد اللي كانوا جايين ياكلوا ويصيفوا على قفايا..
مشيت خطوتين، ووقفت عند الباب، وبصيت ورايا آخر بَصة وقلت الكلمة اللي هزت القاعة:
”آه، صحيح يا إيهاب.. الفيزا بتاعتي اتمسحت من سيستم المطعم ومن حساب العيلة.. يعني لو الفيزا بتاعتك ‘اترفضت’ وأنت بتحاسب.. المطبخ جوة محتاج ناس تغسل الأطباق.. وإنت بسم الله ما شاء الله، صحتك بمب وتتحمل!”
أنا قلت الكلمة دي من هنا، وولعت القاعة من هنا.
إيهاب وشه بقا يطرد شرار، وعيونه جحظت لدرجة حسيت إنها هتطلع من مكانها. مراته وشها بقا أصفر زي الليمونة المخللة، وبدأت تخبط على فخذها وتوشوشه بصوت مرعوب: “اتصرف يا إيهاب! شيك المطعم ده ممكن يدخل له في 30-40 ألف جنيه باللي طلبته كله.. إحنا معيش الرقم ده في الفيزا حالاً!”
أمي وقفت وبدأت تلطم على الخفيف وتدعي: “يا فضيحتنا وسط القرايب! يا خراب بيتك يا نادية.. جاية تكسري بكرامة أخوكي الكبير قدام نسايبه وأعمامه؟”
بصيت لأمي بنظرة كلها وجع مخلوط بقوة، وقلت لها: “أخويا اللي بتتكلمي عنه ده يا أمي، استكتر على ابن أختُه لقمة نضيفة.. استخسر يجبر بخاطر طفل يتيم أبوه سابه في الدنيا دي ومفيش حد يدافع عنه غيري. كرامة إيهاب اللي خايفة عليها، ما جتش ليه وهو بياكل ولاده كباب وبيرمي لابني فضلات؟”
في اللحظة دي، الويتر رجع..
كان ماسك المكنة بتاعة الفيزا في إيد، والفولدر الجلد في الإيد التانية. مشي بخطوات هادية، وعدى من جنب إيهاب اللي كان واقف زي لوح التلج، وجالي لحد عند الباب.
