حكايات زهره 3
في اللحظة اللي دينا صرخت فيها:
“طارق… متسيبنيش!”
حست إنها قالت أكتر جملة كانت بتحاول تخبيها.
سكتت فجأة، وحطت إيديها على بوقها، لكن كان خلاص.
كل الضباط لفوا ناحيتها.
حتى أنا.
بصيتلها بصدمة، وقلت وأنا حاسة إن قلبي بيتقطع:
“متسيبكيش؟ يعني إيه؟”
دينا اتلعثمت.
“لا… لا… أنا قصدي…”
لكن الضابط قاطعها بحزم:
“ممنوع أي حد يتحرك.”
في نفس الوقت كان طارق بيجري بكل سرعته ناحية باب الخروج.
ضابطين جريوا وراه، وهو كان بيزق أي حد يقف في طريقه.
وصل لباب الخروج الإلكتروني، حاول يعدي، لكن الأمن قفل البوابات في ثانية.
لف بسرعة يجري في الاتجاه التاني.
كان بيتصرف كأنه عارف المطار كويس.
طلع على السلم الكهربائي، نزل منه بسرعة، وحاول يستخبى وسط الزحمة.
لكن بعد مطاردة استمرت دقايق، سمعنا صوت حد بيصرخ:
“مسكناه… متحاولش تقاوم.”
رجعت أبص لدينا.
كانت بتعيط بعنف، لكن دموعها ما أثرتش فيا.
قلت بهدوء:
“بصي في عيني.”
رفعت عينيها بالعافية.
“أنا سألتك سؤال واحد… إنتِ كنتِ تعرفي؟”
فضلت ساكتة.
كررت السؤال.
“كنتِ تعرفي؟”
انهارت فجأة.
وقعت على الأرض وهي بتبكي.
“أنا… أنا ماكنتش عايزة الأمور توصل لكده.”
الجملة دي كانت كفاية.
حسيت إن كل الذكريات الجميلة اللي بينا بتتكسر قدامي.
أول يوم جامعة.
أول عيد ميلاد احتفلنا بيه سوا.
سفرنا.
ضحكنا.
كل ده كان بيتحول لرماد.
قلت بصوت مبحوح:
“ليه؟”
فضلت تبكي.
“أنا كنت الأولى طول عمري… ولما إنتِ دخلتي حياتي بقيتي أحسن مني في كل حاجة.”
سكتت لحظة، ومسحت دموعها.
“الأولى في الكلية… الأولى في التقديم… والأولى في التكليف.”
كنت سامعاها، لكن عقلي رافض يصدق.
كملت وهي بتنهار:
“كل الناس بقت تقارن بيني وبينك… حتى أمي.”
بلعت ريقي.
“وده يخليكي تقت\ليني؟”
هزت راسها بسرعة.
“لا… والله ما كنت فاكرة إنها هتوصل لكده.”
“أمال كنتِ فاكرة إيه؟”
قالت بصوت مهزوز:
“طارق قالي إنهم هيعطلوكي كام شهر بس… وإن التحقيق هيثبت براءتك بعدين… وإن خلال الفترة دي أنا هستلم الشغل.”
ضحكت.
ضحكة موجوعة.
“يعني كنتِ مستعدة تدمريني… عشان كام شهر؟”
نزلت راسها في الأرض.
لكن قبل ما ترد…
جه ضابط كبير السن، كانت على كتفه نجوم أكتر من باقي الموجودين.
بصلي باحترام وقال:
“حضرتك الأستاذة ميرنا؟”
هززت راسي.
ابتسم ابتسامة هادئة.
