ابني ساب مراته١
المديرة بصت لي من فوق لتحت وقالت بنبرة قطعت المية والنور جوايا:
— هي دي بقى الحما اللي فاكرة إن البيت بيتها، وبتاكل شقا اليتامى، وفاكرة إن ابنها لما يهرب ويزور أوراق شغل ويتهرب من النفقة مش هنجيبه؟
المحامي طبع على الباب ورقة إعلان رسمي وقالي بصوت جاف:
— البيت ده يا حجة ممتلكات ابنك الهربان.. ومرات ابنك رفعت دعوى تمكين ودعوى نفقة وحبس، والنهارده وصلينا لمكان ابنك المحترم في المحافظة الثانية اللي متجوز فيها وبيشتغل فيها باسم مزور، والشرطة في الطريق تنفذ عليه.. وأنتِ مطلوبة بكرة في النيابة بتهمة الاستيلاء على بضاعة بالقوة والابتزاز!
اتسمرت مكاني والدم هرب من وشي، والعلبة اللي كانت في إيدي وفيها باقي المحشي وقعت على الأرض لاتفتحت واتدلدقت تحت رجلين مرات ابني.
وقفت متسمرة على العتبة، عيني رايحة جاية بين المحامي اللي واقف بثقة، والمديرة اللي بصاتها كانت أتقل من الجبال، ومرات ابني اللي كانت واقفة لأول مرة حاطة عينها في عيني من غير ما ترتعش ولا تنزل رأسها في الأرض.
الدم ينشف في عروقي وأنا بصلهم ومش قادرة أستوعب. ابنك اتمسك؟ ابنك اتكشف مكانه؟ والتهمة… مزور وبيهرب من النفقة؟
صوتي طلع بالعافية، محشرج وطالع من بين سناني:
— أنتوا بتقولوا إيه؟ شرطة إيه ونيابة إيه؟ أنتوا جايين تهجموا عليا في بيتي؟ بيتي اللي آويها هي وعيالها لما ابنها هرب وسابهم؟
المديرة خطت خطوة لقدام، هيبتها كانت ترعب، وبصت لي بقرف صريح وقالت:
— بيتك؟ بيت مين يا أختي؟ أنتِ فاكرة إن الدنيا سايبة، ولا فاكرة إن الشغل في المدارس والتفريز ده شغل هواة؟ أنا سألت وتحريت وعرفت كل حاجة من أصغر عيل في المنطقة لحد الملفات الرسمية. البيت ده باسم ابنك، ومكتوب في عقد جوازها إن ليها المؤخر والشقة تمكين في حالة الغياب.. ابنك اللي هربان ومتجوز في بورسعيد ومغير صفته في الشغل الهارب منه، المباحث جابته الساعة ستة المغرب اليوم، وهو دلوقتي محجوز في القسم هناك وهيترحل على هنا الفجر!
الكلمة نزلت عليا زي الصاعقة. بورسعيد؟ متجوز هناك؟ وابني اتقبض عليه؟
جسمي بدأ يترعش، وجيت أرفع صوتي وأصرخ عشان ألم عليا الجيران وأعمل زيطة كعادتي، المحامي رفع إيده بهدوء وطلع كارت وملف أصفر:
— وفري صوتك يا حجة، عشان الصريخ مش هيفيدك في النيابة بكرة. المديرة عملت بلاغ رسمي باستيلاء بالقوة على بضاعة وأوردرات مدفوعة العربون، ومعانا شهادة الجيران اللي شافوكي وأنتِ نازلة وطالعة بالأكل جبارة، غير شهادة العيال.. وأزيدك من الشعر بيت، مرات ابنك رفعت قضية تمكين من البيت كله، وبكرة قرار التمكين هيتنفذ بصفتها وصية على الأطفال، يعني أنتِ اللي هتدوري على مكان تقعدي فيه لو ما اتعدلتِش!
