ابني ساب مراته٢
الكلمة نزلت عليا كشفت العما اللي كنت فيه.. حبس؟ أنا الست الكبيرة أتبات في التخشيبة عشان صينية بشاميل وعلبة محشي؟
المديرة كانت جالسة جنب المحامي بثبات، ومرات ابني كانت قاعدة في الزاوية، المرة دي مش لابسة المريلة المتوسخة، كانت لابسة عباية نظيفة ورأسها مرفوعة، ما بتتكلمش، سايبة القانون وياخذ لها حقها.
المحامي وقف وقال لوكيل النيابة:
— يا فندم، بالنسبة للزوج، إحنا بنقدم أوراق رسمية بإن موكلي بيشتغل ببطاقة مزورة وفي شركة خاصة باسم مستعار عشان يتهرب من نفقة ولاده الخمس سنين اللي فاتوا، وغير كدة متجوز بأوراق غير رسمية من وحدة ثانية وهربان من أحكام غيابية بالنفقة!
وكيل النيابة بص لابني وقال بصوت صارم:
— المتهم ينحبس أربعة أيام على ذمة التحقيق مع مراعاة الترحيل بتهمة التزوير والتهرب من النفقة.
ابني صرخ وحاول يمسك في رجلين وكيل النيابة:
— لا يا بيه! عشان خاطري! والله هكتب لها كل حاجة، والله هصرف عليهم، بس ما تحبسنيش!
الموقف كان يقطع القلب، وابني بينسحب بالكلبشات وهو بيبص لي ويستغيث، وأنا واقفة عاجزة مش قادرة أعمل له أي حاجة.. الفهلوة اللي كنت فاكراها شطارة، والقسوة اللي كنت بعامل بيها البت الغلبانة، ردت في صدري وصد ابنها زي السهم.
وكيل النيابة بص لي وقال:
— وأنتِ يا حجة، نظراً لسنك، هنسيبك بكفالة مالية قدرها خمسة آلاف جنيه على ذمة القضية.. وتتعهدي بعدم التعرض للزوجة أو دخول شقتها أو منعها من شغلها، وإلا هينفذ عليكِ أمر حبس فوراً!
خمسة آلاف جنيه؟ أجيبهم منين؟ أنا اللي كنت بخلانة بلقمة الأكل على عيال ابني عشان أوفر القرش، بقيت مطالبة أدفع ألفات عشان ما أباتش في الحجز!
طلعت للتفريد والتليفونات، اتصلت بإخواتي، اتصلت بأختي اللي كانت بتاكل معايا من الأكل المنهوب بالأمس.. أول ما عرفوا إن فيها نيابة وكفالة وقضايا، كل واحد بدأ يعتذر ويتحجج: “والله ما حيلتنا، والله الظروف صعبة، أنتِ اللي جبتيه لنفسك يا أختي لما قسيتي على البت!”.
الكل اتخلى عني. الناس اللي كنت بقف أتباهى قدامهم بأني ممشية كلمتي في البيت، سابوني واقفة في الطرقات لوحدي أدور على حد يسلفني عشان أطلع من النيابة.
وبينما أنا قاعدة على دكة الخشب بالنيابة بأبكي بدموع الحسرة والندم، لقيت خيال واقف قدامي. رفعت رأسي.. كانت مرات ابني.
