سلفتي استلفت مني حكاوي شيمو 1
سلفتي طلعتلي تستلف جهاز البراون بتاعي، وكالعادة تاخده ويقعد عندها لحد ما أبعتلها عليه، وهي من يوم ما عرفت إن أخويا جابهولي هدية وهي بتاخده، وأنا بتحرج منها أقولها لأ!
تقولّي: «هشيل شعر وشي بسرعة وهرجعهولك يا حبيبتي»، ألاقي نفسي بعد أسبوع ببعتلها: «يا فلانة، معلش يا حبيبتي، أنا محتاجة جهاز البراون».
ترد عليا بكل برود: «آه يا حبيبتي، أصل هو مشحون؟ ده فاصل شحن، أول ما أشحنه هبعتهولك».
وأنا طبعًا أسكت، وأقول معلش، دي سلفتي ومرات أخو جوزي، ومش مستاهلة أعمل مشكلة على جهاز، حتى لو أنا اللي محتاجاه!
بس اللي حصل بعد كده خلاني أحس إني كنت غلطانة من الأول إني سكت على حقي.
أنا متجوزة بقالي سبع سنين، وسلفتي دي مرات أخو جوزي الكبير، يعني بنشوف بعض كتير، وفي المناسبات والعزومات لازم نتجمع.
هي من النوع اللي لو عندك حاجة جديدة لازم تعرفيها جت منين وبكام ومين اللي جابهالك، ولو الحاجة عجبتها، تفضل تمدح فيها لحد ما تحسي إنك لازم تعرضيها عليها بنفسك!
ويوم ما أخويا جابلي جهاز البراون هدية في عيد ميلادي، كنت فرحانة بيه جدًا، خصوصًا إني كنت نفسي فيه من فترة، ولما شافته عندي قالتلي:
ـ إيه ده يا بنتي؟ هو ده البراون الجديد؟ الله! ده حلو أوي، بكام ده؟
قولتلها وأنا بضحك: ـ والله معرفش يا حبيبتي، أخويا جابهولي هدية.
قالتلي: ـ يا بختك بأخوكي! طب ما تيجي أجربه عندي، أنا عندي شعر وشي تعبني ومش عارفة أعمل فيه إيه.
قولتلها: ـ اتفضلي يا حبيبتي، خديه.
ومن يومها والجهاز بقى كأنه ملكية خاصة عندها!
كل شوية تطلعلي: ـ معلش يا حبيبتي، هاتي البراون يومين.
ـ معلش، أنا عندي مناسبة.
ـ معلش، أصل الجهاز بتاعي باظ.
وأنا كل مرة أديهولها، وأقول لنفسي: مش مشكلة، دي سلفتي، يعني مش واحدة غريبة.
لحد ما في يوم كنت مستعجلة وعندي مشوار مهم، وكنت محتاجة أظبط وشي بسرعة، فافتكرت الجهاز وبعتلها:
«يا فلانة، معلش يا حبيبتي، ابعتيلي البراون مع أي حد نازل، أنا محتاجاه النهارده».
ردت عليا: ـ يا بنتي ما أنا كنت لسه هبعتلك، بس هو مشحونش، سيبيه عندي أشحنهولك.
قولتلها: ـ خلاص يا حبيبتي، ابعتيه زي ما هو، أنا هشحنه عندي.
قالتلي: ـ يا ستي ما تتعبيش نفسك، أنا هشحنه وهبعتهولك.
وسكت.
عدى يوم واتنين وتلاتة، وكل ما أكلمها تقولي مشغولة، لحد ما في يوم بعتلها، وكنت محرجة جدًا إني أكرر نفس الكلام:
