اخويا سرقني 2حكايات صافي هاني
بصيت لشاهين الألفي وهو واقف مستني ردّي بكل جبروته وثقته، وبصيت لكريم اللي كان حرفياً بيموت تحت رجلي، وشه مابقاش فيه نقطة دم، وعينيه كانت بتترجاني بطريقة عمري ما شوفتها منه قبل كده.. كيمو الأخ الصغير المدلل اللي عمره ما شال مسؤولية، واللي كان دايماً شايفني “الداية” اللي بتلم وراه بلاويه، واقف دلوقتي ورقبته تحت سكين حيتان السوق.
حطيت إيدي في جيبي، وخدت نفس طويل، وشميت ريحة جناين التفاح اللي في العزبة.. الريحة اللي بتفكرني بجدي وبكل طوبة بنيتها هنا.
لفيت لشاهين بيه وقلتله بنبرة هادية بس واضحة ومسمعة الكل: “شاهين بيه.. أنا طبعاً يشرفني التعامل مع اسم كبير زي اسمك في السوق، بس للأسف، العرض بتاعك مرفوض.”
المكان كله اتسمر. المحامي الكحلي بقّه اتفتح من الصدمة، وفريدة رفعت راسها وهي مش مصدقة، وكريم شهق كأنه كان مخنوق وطلعاله جُرعة هوا فجأة.
شاهين بيه عينيه ضيقت جداً، والابتسامة الهادية اللي على وشه اختفت، وحسيت بجو المكان كله سقع في ثانية. قرب مني خطوة وقالي بصوت واطي وزي فحيح الأفعى: “مرفوض؟ إنت عارف إنت بترفض عرض مين يا بشمهندس؟ أنا بديك حقك كامل كاش، وبشيل من عليك شيلة أخوك وعكّه، وبنظفلك الورق، يعني بريحك من كل الجوانب.. ترفض ليه؟ طمعان في زيادة؟”
ضحكت ضحكة خفيفة وقلتله: “أنا مابتمناش بفلوس يا بيه، العزبة دي مش مجرد أرض وبيت، دي مكان معيش فيه شباب يتامى ملهمش مأوى بعد ما سنهم كبر، دي فيها شغل وناس وعمر.. العزبة دي مش للبيع، لا بـ 150 ولا بـ 300 مليون ولا بمليار.”
شاهين بيه وشه اسودّ وشاور برجالته، في ثانية اتنين من الحراس الضخام قربوا مني وبقوا واقفين على بعد سنتيمترات، بس أنا م اتهزيتش، فضلت باصص في عينيه بثبات.
كملت كلامي: “أما بالنسبة لأخويا.. فلو إنت فاكر إنك هتاخده هو وست الحسن دي في عربياتك وتخلص حقك بطريقتك، فإنت برضه غلطان.. كريم غلط، وغلطه جناية، وبما إننا في دولة قانون، فالحكومة هي اللي هتاخد حقك وحقي منه.”
شاهين بيه سخر بصوت عالي: “قانون؟ إنت بتهددني بالقانون يا تامر؟ أنا فلوسي مابتضيعش، وأخوك ده مش هيطلع من تحت إيدي غير والـ 150 مليون جنيه بتوعي في حسابي كاملين، وإلا هقبره هو وخطيبته في مكيرم الأرض!”
في اللحظة دي بالظبط، طلعت تليفوني من جيب جاكتي، وبصيت في الساعة، وقلتله: “أنا مابههددش يا شاهين بيه.. أنا بنفذ علطول. من ساعتين بالتمام وأنا في السكة، المحامي بتاعي قدم بلاغ رسمي للنائب العام ولإدارة الأموال العامة بكافة المستندات؛ إلغاء التوكيل، إعلان كريم على يد محضر، وصور الشيكات والتحويلات اللي كريم استلمها من مكتبك.. وبلاغ تاني ضد مكتب العقارات بتاعك بتهمة التزوير واستخدام أوراق لاغية بهدف الاستيلاء على ممتلكات الغير.”
