اخويا سرقني 2حكايات صافي هاني
أول ما نطقت جملة “الأموال العامة”، المحامي اللي بالبدلة الكحلي رمى الفايل من إيده وقعد في الأرض وهو بيصرخ: “يا خراب بيتك يا صابر.. ضعت يا صابر! أموال عامة يا شاهين بيه! قولتلك الورق فيه إنّ قولتلي خلص!”
شاهين بيه لسه هيتكلم ويزعق، صدمته مالحقتش تترجم لحركة، لما صوت سارينات البوليس هزت مدخل الطريق الترابي للعزبة.. مش عربية ولا اتنين، دي كانت قوة كاملة من مباحث الأموال العامة والشرطة، بوكسات وعربيات ترحيلات بتقفل المدخل بالكامل وتطوق المكان كله.
كريم لما شاف البوليس، رمى نفسه تحت رجلي وهو بيعيط ويصرخ: “حبس لأ يا تامر! هتحبسني يا تامر؟ أنا أخوك من دمك! هان عليك ترميني في السجن عشان حتة أرض؟”
بصيتله بحزن شديد وقساوة في نفس الوقت، وقلتله بصوت مسموع وسط دوشة السارينات اللي بتقرب: “إنت اللي هنت على نفسك يا كريم.. لما تبيع شقايا وعمري من ورا ظهري عشان تصرفه على منظرة كدابة ومشروع فاشل، يبقى إنت اللي بعتني.. السجن هو المكان الوحيد اللي هيفوقك ويدفعك ثمن غباءك وطمعك.”
العربيات وقفت، ونزل منها الظباط والقوة، وفجأة اتغيرت موازين القوى في ثانية. الضابط الكبير قرب وعينيه على شاهين الألفي ورجالته، وقال بصوت حازم: “البشمهندس تامر؟”
شاورتله وقلت: “أيوة يا فندم.”
الظابط بلقطة سريعة شاور لرجالته وقال: “اقبضوا على كريم منصور، وفريدة الشناوي، والمحامي صابر عبد العزيز.. وشاهين بيه الألفي، مطلوب استدعاء لحضرتك في النيابة حالاً للتحقيق في بلاغ النصب والتزوير المعروض على الأموال العامة.”
فريدة بدأت تصرخ وتلطم على وشها وهي بتتسحل على عربية البوكس، وكريم كان بيبصلي بنظرة رعب ودموع وهو بيتقيد بالحديد، وشاهين بيه واقف وعينيه بتطلع شرار وهو بيبصلي وكأنه بيتوعدلي بأبشع ميتة، بس ملقاش مفر غير إنه يركب عربيته وتحرسها عربيات الشرطة.
المكان فضي تماماً.. مابقاش في غيري أنا، وغفر العزبة اللي واقفين بعيد مذهولين، وصوت الهوا وهو بيلعب في ورق شجر التفاح.
مشيت ببطء لحد لافتة “تم البيع” اللي كانوا حاطينها جمب البوابة.. مسكتها بإيدي، وبكل عزمي كسرتها نصين ورميتها في التراب.
تليفوني رن في جيبي.. بصيت لشاشة التليفون، كانت رسالة من شركة الطيران: “عزيزي تامر، تم إلغاء حجز رحلتك المتجهة إلى سويسرا بنجاح.”
