اهلي اهانو زوجتي 2حكايات صافي هاني22
لحد ما جه يوم جمعة.. تليفوني رن، وكان المتصل محمود أخويا، وصوته كان مرعوب وبيعيط:
“لحقني يا دانيال.. أمك في العناية المركزة في مستشفى الدمرداش، حالتها حرجة جداً والدكاترة بيقولوا جلطة في القلب.. وهي مش بتنطق غير باسمك أنت وإيمان.. أبوس إيدك تعالوا بسرعة!”
الموبايل كان هيقع من إيدي، وبصيت لإيمان اللي كانت قاعدة بتقرأ قرآن. أول ما شافت وشي وعرفت الخبر، صدقت كلام ربنا في قلبها، وقامت عليا عل طول وقالت: “يلا بينا يا دانيال، دي أمك ومهما كان ملناش بركة إلا دعاها.. والمسامح كريم في الأوقات دي”.
جرينا على المستشفى، ووصلنا لقسم العناية المركزة.
محمود وفادية كانوا واقفين بره، وشوشهم مخطوفة من الخوف والعيط. أول ما شافوني أنا وإيمان، محمود جري عليا وحضني وهو بيترعش، وفادية قربت من إيمان ودموعها نازلة من غير صوت.
الدكتور خرج وقال بنبرة قلقانة: “الحالة غير مستقرة، والضغط واطي جداً.. هي فاقت لدقائق وطلبت تشوف دانيال وإيمان، ادخلوا بسرعة بس من غير انفعال”.
دخلنا الأوضة.. ريحة المطهرات وصوت الأجهزة اللي بتصفر بانتظام يوجع القلب.
أمي كانت نايمة على السرير، وشها شاحب جداً وفي إيدها خراطيم ومحاليل. أول ما فتحت عينيها وشافتنا، حاولت تبتسم، ومدت إيدها اللي بترعش في اتجاهنا.
قربت منها وبست رأسها وإيدها، وإيمان وقفت الناحية التانية وتمسح على جبهتها وبتقرأ آية الكرسي بصوت واطي ومريح.
أمي بصت لإيمان ودموعها سالت على مخدرتها، وبصوت ضعيف وخارج بالعافية قالت:
“سامحيني يا بنتي.. أنا بتموت وأنا حاسة بذنبك كاتم على نفسي.. القلم اللي ضربتهولك زمان كان هو السبب في كل شقا شفته في دنيتي بعد كده.. ربنا عاقبني بيه.. سامحيني عشان أقابل ربنا بقلب خفيف”.
إيمان وطت وبست إيد أمي وقالتلها وعينيها مليانة دموع: “والله العظيم مسامحاكي يا طنط من زمان، وربنا عالم إني دايماً بدعيلك بالصحة والستر.. اشهدي أن لا إله إلا الله واطمني، بيتك وعيالك في أمان”.
أمي لفت وشها ليا، وقالت بصوت متهدج: “دانيال يا ابني.. صون أخوك وأختك بعد ما أمشي.. محمود غلبان وفادية اتعلمت الأدب.. خليك السند ليهم يا ابني.. أنا راضية عنك وعن مراتك ليوم الدين”.
وفجأة.. صوت جهاز ضربات القلب بدأ يصفر بسرعة وبشكل متصل.. والمؤشر بدأ ينزل..
