جارتي الجديده كانت بتدفن بيض ني في الحد
#الكاتبة_نور_محمد
في اللحظة اللي رفعت فيها نجلاء وشها وبصت في عدسة الكاميرا المخفية بين فروع شجرة الليمون، حسيت كأن شلل مفاجئ كل أطراف .
الشاشة الصغيرة في إيدي كانت بتنقل حي. ملامح نجلاء اللي كنت بشوفها هادية وطيبة ومتربية، كانت مشوهة بابتسامة صفرا عريضة، عينيها مبرقة على وسعها وجاحظة في اتجاه العدسة بالظبط، وكأنها مش شايفة كاميرا بلاستيك سودا مستخبية بين الورق.. كأنها كانت باصة في عيني أنا مباشرة، شايفة رجفتي ورا شاشة الموبايل في قلب ضلمة شقتي!
ثبتت مكانها لثواني طويلة، الهوا كان بيحرك طرف إسدالها الأسود الخفيف، وبعدين رفعت إيدها الاتنين ببطء شديد.
الإيد اليمين كانت ماسكة البيضة النيّة، والإيد الشمال كان فيها إبرة خياطة طويلة وتخينة زي اللي بيخيطوا بيها المراتب. رفعت البيضة لمستوى وشها، وبحركة هادية باردة تخلع القلب، غرست سن الإبرة في قشرة البيضة وخرمتها من فوق، وبدأت تلف الإبرة جواها وهي عينها لسه في الكاميرا، وبتتحرك شفايفها بتمتمة سريعة مش مسموعة.
وفجأة.. ضغطت على البيضة بكل قوتها بين صوابعها!
القشرة اتفرتكت في قبضة إيدها، بس اللي نزل وسال على صوابعها مكانش زلال أبيض وصفار بيض نيء زي ما أي عقل يتخيل.. اللي نزل كان سائل أسود تقيل ولزج زي القطران، نازل منه ريحة كنت حاسة إني شماها من ورا الشاشة من كتر بشاعة المنظر!
ومن وسط القشر المتكسر والسائل الأسود، شدت نجلاء بإبرتها خصلة شعر طويلة، مربوطة بخيط صوف أحمر ومعقودة كذا عقدة.. وفي طرف العقدة كان مشبوك فيها حتة قماش صغيرة مقصوصة، لونها بيج منقوش بورود زرقا!
الدم هرب من نافوخي في ثانية، وحسيت بركبي سابت والأرض بتلف بيا.
حتة القماش دي.. ده كان طرف البيجامة بتاعتي! البيجامة اللي كنت لابساها أول يوم دخلت فيه نجلاء بيتي تشرب معايا الشاي عشان نتعرف! البيجامة اللي دورت عليها في الدولاب من أسبوع وملقيتهاش وقولت لنفسي يمكن ضاعت في الغسيل!
نجلاء رفعت خصلة الشعر والقماشة، قربتهم من مناخيرها وشمتهم بابتسامة متلذذة تقشعر لها الأبدان، وبعدين داست على القشر والسائل الأسود بجزمتها في الأرض، وبصت في الكاميرا للمرة الأخيرة، وحركت شفايفها ببطء شديد، كلمة كلمة، وهي بتهته بصوت واطي الكاميرا لقطت صفيره في المايك:
